د ایران د بهرنیو چارو وزیر، سید عباس عراقچي، له یوه تاجکستاني پلاوي سره په لیدنه کې د دواړو هېوادونو ترمنځ د اړیکو پر پراختیا، په ځانګړي ډول د اقتصادي، سوداګریزو، انرژۍ او ترانسپورټي برخو کې، ټینګار کړی دی.
د تسنیم خبري اژانس د شنبې په ورځ، د زمري ۲۴مه، راپور ورکړی چې د تاجکستان د انرژۍ او اوبو سرچینو وزیر دلیر جمعه، د ترانسپورټ وزیر عظیم ابراهیم او د بهرنیو چارو وزارت مرستیال فرخ شریفزاده له عراقچي سره لیدلي او خبرې یې کړي دي.
د راپور له مخې، عراقچي ایران او تاجکستان د لرغوني پارسي تمدن وارثان بللي او د دواړو هېوادونو ترمنځ د اقتصادي او سوداګریزو اړیکو د پراختیا لپاره یې د شته ظرفیتونو پر کارولو ټینګار کړی دی.
تاجکستاني وزیرانو هم په دې لیدنه کې د انرژۍ او ترانسپورټ په برخو کې د همکاریو پر پراختیا ټینګار کړی او د دواړو هېوادونو ترمنځ د شویو تفاهمونو د عملي کېدو لپاره یې د یوې ګډې کاري ډلې د جوړولو غوښتنه کړې ده.
دواړو لورو په دې لیدنه کې د اقتصادي، سوداګریزو، انرژۍ او ترانسپورټي همکاریو د پراختیا پر لارو چارو خبرې کړي دي. د ګډې کاري ډلې د جوړېدو د وخت او د هغې د مشخصو پلانونو په اړه نور جزئیات نه دي ورکړل شوي.
لیکواله:سلیمه آریایي
